Síðastliðinn laugardag fór fram í góðu veðri á Selfossvelli innanfélagsmót Selfoss þar sem aðalgreinin var spjótkast karla.
Allir helstu spjótkastarar landsins voru mættir til leiks. Þar á meðal voru kastarar sem reyndu við lágmörk inn á stórmót erlendis ásamt því að reyna við heimsmet.
Selfyssingurinn Örn Davíðsson sem keppir fyrir FH kastaði lengst allra, 70,12 m. og kastaði í fyrsta skipti yfir 70 m. í þrjú ár. Annar varð Dagbjartur Daði Jónsson ÍR með 63,74 m. en hann reynir við lágmark inn á HM unglinga 19 og yngri sem er 69,00 m. Þriðji varð svo Helgi Sveinsson Ármanni með kast upp á 56,27 m. sem er ekki langt frá hans besta og ekki langt frá heimsmeti í hans fötlunarflokki.
Guðmundur Sverrisson ÍR, sem á ættir að rekja á Selfoss, reyndi við lágmark fyrir EM fullorðinna í Hollandi sem er 79,00 m. (á best rúma 80 m.) en gerði því miður allt ógilt sem og Litháinn Maríus Simanavicius en hann á yfir 73,00 m.
Einnig var keppt í kúluvarpi karla þar sem Orri Davíðsson Ármanni (bróðir Arnar) sigraði á bætingu, 15,17 m., og kúluvarpi kvenna en þar hafði Thelma Björk Einarsdóttir Selfossi best með 11,35 m. Í langstökki kvenna sigraði svo Harpa Svansdóttir Selfossi stökk 4,96 m.