76. Íþróttaþing ÍSÍ var haldið í Ólafssal að Ásvöllum í Hafnarfirði um helgina. HSK átti rétt á að senda sjö fulltrúa á þingið og mætti með fullmannað lið báða dagana.
Á þinginu var kosið um sjö meðstjórnendur í framkvæmdastjórn ÍSÍ. Selfyssingurinn Olga Bjarnadóttir hlaut glæsilega endurkosningu, en hún fékk flest atkvæði þeirra sem buðu sig fram og hlaut 194 atkvæði. Olga hefur setið í framkvæmdastjórn ÍSÍ síðan 2019.
Þingfulltrúar HSK voru þau Guðríður Aadnegard formaður HSK, Helgi S. Haraldsson varaformaður HSK, Guðmundur Jónasson gjaldkeri HSK, Engilbert Olgeirsson framkvæmdastjóri HSK, Gestur Einarsson varastjórn HSK, Lárus Ingi F Bjarnason varastjórn HSK, Guðjóna Björk Sigurðardóttir gjaldkeri Hamars og Gissur Jónsson framkvæmdastjóri Umf. Selfoss.
Fjölmargar tillögur voru lagðar fram á þinginu. Meðal tillagna sem samþykktar voru á þinginu á laugardag var tillaga um skipulag íþróttahéraða og tillaga um breytingar á skiptingu tekna frá Íslenskri getspá. Þá voru gerðar breytingar á lögum ÍSÍ þar sem m.a. var samþykkt að fækka þingfulltrúum talsvert. Það hefur að óbreyttu þau áhrif að fulltrúum HSK mun fækka úr sjö í fimm.