Körfuknattleiksmaðurinn Oddur Ólafsson hefur samið við Þórsara og mun leika með þeim í úrvalsdeildinni á komandi keppnistímabili.
Oddur lék með Val síðasta vetur en fram að því hafði hann spilað með Hamri fyrir utan nokkur ár í Bandaríkjunum þar sem Oddur lék bæði í menntaskóla og háskóla. Oddur er úr Ölfusinu og er því kominn í sitt heimalið.
„Ég þekki ágætlega til í Þorlákshöfn þar sem ég spilaði með sameiginlegu liði Hamars og Þórs meira og minna upp alla yngri flokkana. Ég hef spilað með flestum af þessum strákum og veit því nokkurnveginn að hverju ég geng. Umgjörðin í kringum liðið hefur vakið athygli síðustu tímabil og verður spennandi að koma inn í liðið í minni heimasveit þar sem ég er uppalinn Ölfusingur. Liðið er ungt og sprækt og því spennandi tímar framundan í Höfninni,“ segir Oddur í viðtali á heimasíðu Þórsara.