Nýliðarnir lögðu deildarmeistarana

Úrvalsdeildarliði Hamars. Ljósmynd: Guðmundur Erlingsson.

Nýliðar Hamars í úrvalsdeild karla í blaki tóku í kvöld á móti deildarmeisturum síðustu leiktíðar, Þrótti frá Neskaupsstað.

Leikurinn fór fram í Hveragerði og var leikið fyrir luktum dyrum samkvæmt fyrirmælum Blaksambands Íslands en fyrirkomulagið var ákveðið í kjölfarið á upplýsingafundi Almannavarna í dag.
Hamarsmönnum var, þrátt fyrir að vera nýliðar, spáð efsta sæti af þjálfurum og fyrirliðum í deildinni og má segja að liðið hafi staðið undir væntingum í fyrsta leik.
Sigur Hamars var öruggur en Þróttur átti þrátt fyrir það góða spretti og lét Hamarsmenn vinna fyrir stigunum þremur.  Lokastaðan í leiknum var 3 -0 fyrir Hamar og unnust hrinurnar 25-22, 25-21 og 25-16.
Stigahæstur í liði Hamars var Jakub Madej með 13 stig en stigahæstur í leiknum var Miguel Angel Ramos Melero með 14 stig.