Knattspyrnudeild Selfoss hefur samið við bandaríska framherjann Mallory Olsson til eins árs.
Olsson, sem verður 23 ára í vor, kemur til Selfoss úr bandaríska háskólaboltanum en hún skoraði fimm mörk fyrir lið UCF háskólans í Flórída á síðasta tímabili.
Þessi hávaxni framherji mun fylla skarðið sem Brenna Lovera skilur eftir sig hjá félaginu en Lovera skoraði 21 mark í 34 leikjum fyrir Selfoss síðustu tvö tímabilin og var meðal annars markadrottning úrvalsdeildarinnar sumarið 2021.
Selfoss hefur keppni í Lengjubikarnum á morgun, laugardag, þegar liðið heimsækir Íslandsmeistara Vals að Hlíðarenda.