Selfoss tók á móti KA/Þór í úrvalsdeild kvenna í handbolta í Set-höllinni Iðu í dag. Eftir jafnan fyrri hálfleik tóku norðankonur völdin í seinni hálfleik og sigruðu 22-26.
KA/Þór byrjaði vel og komst snemma í 1-4 en þá tóku Selfyssingar við sér og jöfnuðu 8-8 eftir rúmlega 18 mínútna leik. Eftir það var jafnt á öllum tölum og staðan var 13-13 í hálfleik.
Byrjunin var ekki nógu góð hjá Selfyssingum í seinni hálfleik, KA/Þór skoraði fyrstu fimm mörkin og byggði þar upp forskot sem dugði þeim út leikinn.
Hulda Dís Þrastardóttir var markahæst Selfyssinga með 8/5 mörk, Arna Kristín Einarsdóttir, Eva Lind Tyrfingsdóttir og Marte Syverud skoruðu 3 mörk, Emelía Ósk Aðalsteinsdóttir og Hulda Hrönn Bragadóttir 2 og Adela Eyrún Jóhannsdóttir 1.
Sara Xiao Reykdal varði 12/1 skot í marki Selfoss og var með 32% markvörslu.
Selfoss er í botnsæti deildarinnar með 4 stig en KA/Þór er í 6. sæti með 15 stig.