Uppsveitir heimsóttu Hörð á Ísafjörð í 5. deild karla í knattspyrnu í dag. Eftir mikið markaregn hafði Hörður 5-4 sigur.
Uppsveitir byrjuðu ekki vel í leiknum, áttu erfitt með að verjast föstum leikatriðum og eftir rúmar tuttugu mínútur voru Harðverjar komnir í 2-0. Heimamenn bættu svo þriðja markinu við í uppbótartíma fyrri hálfleiks og staðan var 3-0 þegar flautað var til leikhlés.
Vonarglæta kviknaði hjá Uppsveitum í upphafi seinni hálfleiks þegar Pétur Geir Ómarsson minnkaði muninn með góðu marki. Hörður svaraði hins vegar fyrir sig með tveimur mörkum á þremur mínútum um miðjan seinni hálfleikinn og staðan 5-1 þegar tuttugu mínútur voru eftir.
Það voru hins vegar Uppsveitamenn sem áttu lokaorðið og röðuðu inn mörkum í lokin. Pétur Geir minnkaði muninn á 76. mínútu og þremur mínútum síðar skoraði Auðunn Ingi Hafsteinsson, 5-3. Uppsveitir minnkuðu svo muninn í eitt mark í uppbótartímanum, þeir fengu vítaspyrnu á 91. mínútu og úr henni kórónaði Pétur Geir þrennuna. Skömmu áður hafði Þorsteinn Bergmann Heiðarsson fengið að líta rauða spjaldið og 10 á móti 11 tókst Uppsveitamönnum ekki að jafna metin.
Uppsveitir eru áfram í 3. sæti A-riðils 5. deildarinnar með 9 stig en Hörður er í 5. sæti með 6 stig.