MS styður við handboltann á Selfossi

Handknattleiksdeild Umf. Selfoss og MS hafa undirritað samstarfssamning með það að markmiði að efla íþrótta- og forvarnarstarf deildarinnar.

Með þessum nýja samningi verður fyrirtækið einn af aðalstyrktaraðilum deildarinnar keppnistímabilið 2017-2018. Í tilkynningu frá handknattleiksdeildinni segir að MS hafi alla tíð stutt vel við íþróttastarf á Selfossi en fyrirtækið er einn stærsti atvinnustaður bæjarfélagsins og tengsl þess við íþrótta- og æskulýðsstarf bæjarins eru því sterk.

Selfyssingar eiga bæði karla- og kvennalið í Olís deildinni í vetur og reka mjög öflugt barna- og unglingastarf auk akademíu við Fjölbrautaskóla Suðurlands. Samningur þessi mun styrkja starf handknattleiksdeildarinnar, sem stöðugt fer stækkandi og báðir aðilar skuldbinda sig til að vinna saman að sameiginlegum markmiðum sem tilgreind eru í samstarfssamningi.

Handknattleiksdeildin er mjög ánægð og þakklát fyrir þennan samstarfssamning við MS og deildin mun áfram að leggja sig fram um að bæta sig á öllum sviðum starfsins, í ört stækkandi Ungmennafélagi Selfoss.