Það var boðið upp á spangól og spennu þegar Árborg tók á móti Úlfunum í 4. deild karla í knattspyrnu á Selfossvelli í kvöld. Leiknum lauk með 2-0 sigri Árborgar.
Leikurinn var markalaus í fyrri hálfleik en bæði lið fengu dauðafæri og Úlfarnir áttu meðal annars skot í stöng.
Baráttan hélt áfram á báðum endum í seinni hálfleik en rétt í þann mund sem sólin braust loksins fram úr skýjunum á Selfossi, á 64. mínútu leiksins, hamraði Freyr Héðinsson boltann í netið af stuttu færi eftir góðan undirbúning Jökuls Hermannssonar.
Árborgarar fögnuðu vel og ekki var fögnuðurinn minni fimm mínútum síðar þegar Sigurjón Reynisson tvöfaldaði forskot Árborgar með bylmingsskoti fyrir utan teig.
Lokatölur 2-0 og Árborg siglir nokkuð lygnan sjó í 3. sæti deildarinnar með 25 stig en Úlfarnir eru í 5. sæti með 15 stig.