Selfoss og Kári mættust í mikilvægum leik í toppbaráttu 2. deildar karla í knattspyrnu í Akraneshöllinni í kvöld. Fyrir leik kvöldsins voru liðin í 2. og 3. sæti með jafnmörg stig.
Fyrri hálfleikur var markalaus en Frosti Brynjólfsson kom Selfyssingum í 0-1 á fyrstu mínútu síðari hálfleiks. Bæði lið áttu góðar sóknir eftir það en hlutirnir litu vel út fyrir Selfoss á 81. mínútu þegar Guðmundur Stefánsson skoraði glæsilegt mark og staðan orðin 0-2.
Það voru hins vegar Káramenn sem áttu lokaorðið, fimm mínútum eftir mark Guðmundar voru þeir búnir að jafna 2-2 og þar við sat.
Eftir leiki kvöldsins eru Káramenn áfram í 2. sæti, Selfoss í 3. sæti og Fjölnir í 4. sæti en öll liðin eru með 12 stig. Fjórum stigum á eftir Haukum sem eru í toppsætinu.