Hamar og Selfoss töpuðu leikjum sínum í 1. deild karla í körfubolta í kvöld. Hamar tók á móti Sindra en Selfoss heimsótti Skallagrím. Úrslit beggja leikja réðust á lokaandartökunum.
Leikur Hamars og Sindra var jafn allan tímann en liðin skiptust á um að hafa frumkvæðið. Staðan í hálfleik var 42-40, Hamri í vil. Seinni hálfleikur var jafn og spennandi og það var ekki fyrr en á síðustu tveimur mínútunum að skotin fóru að geiga hjá Hamri og Sindramenn skriðu framúr. Lokatölur urðu 79-86. Franck Kamgain var stigahæstur Hamarsmanna með 28 stig en Ryan Peters var framlagshæstur með 19 stig og 20 fráköst.
Í Borgarnesi voru sveiflurnar miklar, liðin skiptust á um að gera áhlaup en í hálfleik var staðan 39-50, Selfyssingum í vil. Selfoss hélt forystunni allt þar til 33 sekúndur voru eftir af leiknum en þá komst Skallagrímur yfir 92-90. Selfyssingum tókst ekki að skora á lokakaflanum en Borgnesingar skoruðu síðustu tíu stigin í leiknum og tryggðu sér 96-90 sigur. Steven Lyles var stigahæstur Selfyssinga með 22 stig en Collin Pryor var framlagshæstur með 20 stig og 15 fráköst.
Hamar er áfram í botnsæti deildarinnar með 4 stig en Selfoss er í 8. sætinu með 12 stig.
Skallagrímur-Selfoss 96-90 (28-21, 11-29, 27-24, 30-16)
Tölfræði Selfoss: Steven Lyles 22, Collin Pryor 20/15 fráköst/7 stoðsendingar, Kristijan Vladovic 19/8 fráköst/11 stoðsendingar, Halldór Halldórsson 12, Tristan Máni Morthens 9/7 fráköst, Ari Hrannar Bjarmason 8/4 fráköst.
Hamar-Sindri 79-86 (22-23, 20-17, 15-19, 22-27)
Tölfræði Hamars: Franck Kamgain 28/8 fráköst/8 stoðsendingar, Ryan Peters 19/20 fráköst, Lúkas Aron Stefánsson 12/6 fráköst, Arnar Dagur Daðason 6, Jens Hjorth Klostergaard 6, Birkir Máni Daðason 6, Björn Ásgeir Ásgeirsson 2, Aron Orri Hilmarsson 4 fráköst.