Í hálfleik í leik Fylkis og Selfoss í 1. deild karla í knattspyrnu í gærkvöldi var falleg stund þar sem aðstandendur Egils Hrafns Gústafssonar færðu 2. flokkum karla og kvenna hjá báðum félögum sitthvorn 250 þúsund króna styrkinn til uppbyggingar á þeirra starfi.
Egill Hrafn var Fylkismaður í húð og hár. Hann komst í fréttirnar árið 2015 er hann safnaði 1.100 krónum fyrir knattspyrnudeild félagsins, þá níu ára gamall. Auk þess að vera stuðningsmaður Fylkis var Egill líka iðkandi hjá félaginu. Egill hafði líka tengingar við Selfoss og dvaldi mikið í bænum hjá ömmu sinni og afa og skyldmennum.
Egill lést 17 ára gamall árið 2023 og var minningarsjóður stofnaður í nafni hans. Markmið sjóðsins er að styðja við verkefni sem stuðla að þátttöku ungmenna á aldrinum 16-20 ára í íþrótta- og tómstundastarfi. Brotthvarf ungmenna á þessum aldri úr íþróttum og skipulögðu starfi þegar að grunnskóla og frístundastarfi sleppir er því miður alltof algengt. Aðgengi að íþróttum og tómstundum fyrir ungmenni þar sem félagslegi þátturinn og samvera er í fyrirrúmi er mikilvægt lýðheilsumál.
