Metskráning í Hengill Ultra

Hlauparar í Henglinum.

Algjör metskráning er í utanvegahlaupið Hengil Ultra sem haldið er í Hveragerði þann 8. september næstkomandi en fjöldi keppenda nálgast nú 300 og koma þeir frá öllum heimshornum.

Keppendur frá fimmtán þjóðlöndum eru skráðir til leiks. Þeir koma frá ýmsum Evrópulöndum, Bandaríkjunum, Kanada og Nýja-Sjálandi.

Hengill Ultra er lengsta utanvega hlaup á Íslandi en boðið er upp á sex mismunandi keppnisleiðir og möguleika. Það eru 100 kílómetra, 50, 25, 10 og svo 5 kílómetra hlaup en nú er í fyrsta sinn boðið upp á 4×25 kílómetra boðhlaup.

Byrjunarreitur allra vegalengda og mótsstjórn verður við Skyrgerðina í hjarta Hveragerðis. Gjafapoki með óvæntum glaðningi frá samstarfsaðilum er innifalinn í skráningu fyrir alla þá sem skrá sig fyrir miðnætti sunnudaginn 2. september.

Hengill Ultra er síðasta stóra hlaup sumarsins og má því segja að þetta verði sannkölluð uppskeruhátíð íslenskra hlaupara.

Eftir keppni er öllum keppendum boðið í sveittan borgara með blóði, svita og tárum á “The Finish Line Burger Joint” sem er besta POP-UP borgarabúllan á landinu. Öllum keppendum er boðið í sund og chill í lystigarðinum í Hveragerði. Verðlaunaafhending og grillveisla fyrir keppendur og aðstandendur verður svo kl 17:00. Tímatökubúnaður verður notaður og allir hlauparar hlaupa með tímatökuflögur. Þá er líka dregið úr glæsilegum brautarvinningum í verðlaunaafhendingunni. Þannig að allir fá eitthvað til minningar um þátttökuna í þessum mikla afrekshlaupi.

Slagorð hlaupsins er „Allir hlaupa, allir vinna og allir velkomnir“

Allt um hlaupið og skráningar hér.