Héraðsmót HSK í frjálsum íþróttum var haldið á Selfossvelli dagana 10.-11. ágúst. Þrjú af aðildarfélögum frjálsíþróttaráðs tóku þátt í mótinu. Gestaþátttaka var heimil á mótinu og voru um 40 gestir skráðir til leiks frá sex félögum. Mótið var skráð sem Global calendar mót og gildir því árangur sem náðist á mótinu sem lágmark á stórmót.
Einn af gestum mótsins var Hera Christensen úr FH. Hún gerði sér lítið fyrir og bætti eigið Íslandsmet í kringlukasti kvenna. Hún kastaði 57,34, en nokkra vikna met hennar var 56,76 sek. Metið er einnig Íslandsmet í 20-22 ára flokki og að auki nýtt vallarmet á Selfossvelli.
Héraðsmótið er stigakeppni milli aðildarfélaga sambandsins, en aðeins félagar í aðildarfélögum HSK geta safnað stigum og unnið héraðsmeistaratitil. Selfyssingar höfðu mikla yfirburði í stigakeppni mótsins og unnu stigabikarinn með 327 stig, Dímon varð í öðru sæti með 80 stig og Þjótandi í þriðja með 9 stig. Veitt voru verðlaun fyrir stigahæstu keppendur mótsins. Magnea Furuhjelm Magnúsdóttir úr Dímon varð stigahæst í kvennaflokki og Daníel Smári Björnsson Selfossi var stigahæsti karl mótsins.
Samtals voru 18 HSK met sett á mótinu, öll í eldri aldursflokkum. Örn Davíðsson Selfossi bætti eigið HSK met í sleggjukasti í flokki 35-39 ára, kastaði 48,26 metra.
Páll Jökull Pétursson keppandi Umf. Selfoss setti sjö HSK met í flokki 65-69 ára. Hann fjórbætti eigið HSK met í kúluvarpi með 7,26 kg kúlu, kastaði lengst 7,65 metra. Í sleggjukasti með 7,26 kg leggju bætti hann eigið met, kastaði 13,66 metra. Þá tvíbætti hann HSK met sitt í spjótkasti með 800 gr. spjóti, kastaði lengst 26,02 metra.
Árný Heiðarsdóttir Selfossi setti 10 HSK met í fjórum greinum á mótinu í flokki 70-74 ára kvenna. Öll metin eru jafnframt landsmet í viðkomandi flokki. Árný kastaði kringlunni 19,19 metra og bætti öldungamet Erlu Óskarsdóttur frá 2015, um rúma þrjá metra. Árný setti svo þrjú met í sleggjukasti, kastaði 4 kg sleggjunni lengst 23,40 metra. Kvennaspjótið flaug 17,00 sem er met og hún bætti sig fimm sinnum í kastseríunni í kúluvarpi með 4 kg kúlu, kastaði lengst 7,44 metra.