Sunnlenskt frjálsíþróttafólk fjölmennti á Gautaborgarleikana í frjálsum íþróttum sem fram fóru á Slottsskogsvallen í Gautaborg í Svíþjóð í lok júní. Frábær árangur náðist á mótinu, mikið var um persónulegar bætingar, Íslandsmet, HSK met og margir komust á verðlaunapall.
Bryndís Embla Einarsdóttir, Umf. Selfoss, sigraði bæði í kúluvarpi og spjótkasti U18. Hún átti stórkostlega seríu í spjótinu þar sem hún setti mótsmet og þríbætti og stórbætti eigið Íslandsmet í flokki 16-17 ára stúlkna með 500 gr spjóti. Gamla metið síðan í júní síðastliðnum var 51,94 metra en eftir tvö góð köst yfir 53 metra kom sigurkastið upp á 57,02 metra. Kastið skaut henni í toppsætið U18 í Evrópu og á þriðja sæti heimslistans.
Helga Fjóla Guðnadóttir, Íþf. Garpi, setti fjögur héraðsmet á mótinu. Hún varð í 3. sæti í langstökki U18 með stökk upp á 5,52 m og bætti þar um 10 sm HSK metin í flokkum 16-17 ára og 18-19 ára stúlkna. Gömlu metin átti Helga Fjóla með Önnu Mettu Óskarsdóttur, Umf. Selfoss.
Hún gerði sér svo lítið fyrir og tvíbætti HSK-metið í 100 m grindahlaupi 16-17 ára stúlkna. Í undanrásum hljóp hún á 15,21 sek og bætti þar 27 ára gamalt met Ágústu Tryggvadóttur, Umf. Selfoss, um 0,01 sek og gerði svo enn betur í úrslitahlaupinu þar sem hún hljóp á 15,17 sek. Helga Fjóla er í fínu formi og hún bætti einnig sinn persónulega árangur í 100 m hlaupi og hástökki á mótinu.
Ívar Ylur Birkisson, Íþf. Dímon, sigraði í 110 m grindahlaupi U20 og tvíbætti eigið HSK met í flokki 18-19 ára pilta. Í undanrásum hljóp Ívar á 14,25 sek og bætti fyrra met sitt um 0,47 sekúndur. Hann bætti svo um betur í úrslitahlaupinu þar sem hann hljóp á 14,18 sek.
Fleiri Sunnlendingar komust á verðlaunapall. Ásta Krístín Ólafsdóttir, Umf. Selfoss, vann gull í spjótkasti í 15 ára flokki, Anna Metta Óskarsdóttir, Umf. Selfoss, hreppti bronsið í þrístökki U18 og Hjálmar Vilhelm Rúnarsson, Umf. Selfoss, hlaut bronsverðlaun í hástökki U20. Þá vann Kristján Kári Ólafsson, Umf. Selfoss, brons í sleggjukasti U20 og Daníel Breki Elvarsson , Umf. Selfoss, tók bronsverðlaun í karlaflokki í spjótkasti.
