KFR tók á móti Álafossi í botnslag 4. deildar karla. Um sannkallaðan sex stiga leik var að ræða og eftir hörkubaráttu hafði KFR 3-2 sigur.
Væntanlega hefur það verið lukkudýrið Messi sem færði Rangæingum sigurinn en Rúnar Þorvaldsson leiddi heimalninginn fræga inná völlinn í upphafi leiks.
Leikurinn var í járnum á upphafsmínútunum en á 21. mínútu fengu Rangæingar vítaspyrnu sem Helgi Valur Smárason skoraði úr. Gestirnir hresstust til muna eftir að hafa lent undir og svöruðu fyrir sig með tveimur mörkum áður en flautað var til leikhlés, 1-2 í hálfleik.
Seinni hálfleikurinn var í járnum og gestirnir ógnuðu mikið en það voru KFR-menn sem skoruðu mörkin. Unnar Jón Ásgeirsson og Rúnar Þorvaldsson skoruðu með stuttu millibili um miðjan seinni hálfleikinn og tryggðu KFR 3-2 sigur.
KFR lyfti sér úr fallsæti, upp í 7. sæti deildarinnar með 12 stig en Álafoss situr eftir á botninum með 8 stig.
