„Menn fóru eftir planinu“

Árni Steinn Steinþórsson skoraði sjö mörk fyrir Selfyssinga í dag. sunnlenska.is/Guðmundur Karl

Selfoss vann mjög öruggan sigur á Stjörnunni í fyrsta leik liðanna í átta liða úrslitum um Íslandsmeistaratitil karla í handbolta í dag. Lokatölur á Selfossi urðu 33-25.

„Ég er ánægður með sig­ur­inn. Það var margt gott í þessu í dag og ég var sér­stak­lega ánægður með strák­ana sem komu inn af bekkn­um. Menn fóru eft­ir plan­inu,“ sagði Patrekur Jóhannesson, þjálfari Selfoss, í samtali við sunnlenska.is eftir leik.

„Stemmningin í húsinu var frábær og ég vona innilega að við fáum sama stuðning á mánudagskvöld. Þetta gef­ur okk­ur svo mik­inn kraft. Strák­arn­ir fengu ork­una úr fólk­inu og ég held að fólkið hafi skemmt sér mjög vel í dag.“

Öruggt forskot mest allan leikinn
Selfoss skoraði fyrstu þrjú mörk leiksins en Stjarnan jafnaði 4-4 þegar fjórtán mínútur voru liðnar. Þá tóku Selfyssingar af skarið, skoruðu fjögur mörk í röð og juku forystuna mest í sjö mörk í kjölfarið. Staðan var 15-10 í hálfleik.

Seinni hálfleikurinn var í ákaflega öruggum höndum Selfyssingar sem höfðu sex marka forskot lengst af en bættu svo í undir lokin.

Árni Steinn vígalegur í vörninni
Teitur Örn Einarsson var markahæstur Selfyssingar með 8 mörk en maður leiksins var Árni Steinn Steinþórsson sem skoraði 7 mörk og var algjörlega frábær í vörninni með tíu brotin fríköst.

Hergeir Grímsson skoraði 5 mörk, Elvar Örn Jónsson 4, Atli Ævar Ingólfsson 3, Richard Sæþór Sigurðsson og Einar Sverrisson 2 og þeir Haukur Þrastarson og Guðjón Baldur Ómarsson skoruðu báðir 1 mark.

Sölvi Ólafsson varði 11 skot í marki Selfoss og var með 35% markvörslu og Helgi Hlynsson varði 5 skot og var með 50% markvörslu.

Næsti leikur á mánudagskvöld
Næsti leikur liðanna verður í Garðabænum á mánudagskvöld og takist Selfyssingum að vinna eru þeir komnir í undanúrslit.