Selfoss heimsótti Aftureldingu í úrvalsdeild karla í handbolta í Mosfellsbæinn í kvöld. Heimaliðið var mun sterkara og vann öruggan sigur, 42-34.
Leikurinn var jafn fyrstu tíu mínúturnar, þá náðu Mosfellingar þriggja marka forskoti sem jókst enn frekar undir lok fyrri hálfleiks. Munurinn varð mest átta mörk og staðan var 20-12 í hálfleik.
Afturelding hafði örugga forystu allan seinni hálfleikinn og Selfyssingar voru hvergi nærri því að koma sér inn í leikinn.
Jónas Karl Gunnlaugsson var markahæstur Selfyssinga með 10 mörk, Hákon Garri Gestsson skoraði 5, Valdimar Örn Ingvarsson og Guðjón Baldur Ómarsson 4, Anton Breki Hjaltason og Haukur Páll Hallgrímsson 3, Sölvi Svavarsson 2, Tryggvi Sigurberg Traustason og Sveinn Ísak Hauksson 1 og Aron Leo Guðmundsson 1/1.
Alexander Hrafnkelsson varði 3 skot í marki Selfoss og var með 10% markvörslu og Ísak Kristinn Jónsson varði 2 skot og var með 11% markvörslu.
Selfoss er í 11. sæti úrvalsdeildarinnar með 1 stig en Afturelding er í 3. sæti með 5 stig.