Það gekk á ýmsu þegar Selfoss mætti KFA í 1. umferð 2. deildar karla í knattspyrnu á gervigrasvellinum á Selfossi í dag. Austfirðingar kláruðu leikinn í fyrri hálfleik og sigruðu 2-4.
Staðan var orðin 0-2 eftir fjórtán mínútna leik og tvö glæsimörk gestanna. Jón Daði Böðvarsson hélt vonum Selfyssinga á lífi með stórkostlegu marki á 41. mínútu en KFA komst tveimur mínútum síðar í 1-3. Á lokamínútu fyrri hálfleiks braut Benjamín Jónsson, markvörður Selfoss af sér í teignum, honum var vísað af velli með rautt spjald og KFA fékk vítaspyrnu, sem þeir skoruðu úr og staðan því 1-4 í hálfleik.
Þrátt fyrir að vera manni færri byrjuðu Selfyssingar betur eftir leikhléið og Aron Lucas Vokes minnkaði muninn í 2-4 strax á 4. mínútu seinni hálfleiks. Selfyssingum tókst ekki að brúa bilið í seinni hálfleiknum og enn syrti í álinn á 71. mínútu þegar varamaðurinn Brynjar Bergsson fékk sitt annað gula spjald og þar með rautt. Selfyssingar spiluðu því síðustu tuttugu mínúturnar níu á móti ellefu og máttu ekki við margnum.
Næsti leikur Selfoss er gegn Hvíta riddaranum á útivelli næstkomandi laugardag en Hvíti gerði 3-3 jafntefli við Víking Ólafsvík í 1. umferðinni.