Níu mörk litu dagsins ljós þegar Hamar tók á móti KFR í 4. deild karla í knattspyrnu í kvöld. Hamar vann öruggan 7-2 sigur.
Guido Rancez kom Hamri yfir með marki úr vítaspyrnu strax á 8. mínútu. Ævar Már Viktorsson jafnaði metin á 28. mínútu en Hvergerðingar svöruðu jafnharðan með mörkum frá Mána Snæ Benediktssyni og öðru frá Rancez. Staðan var 3-1 í hálfleik.
Tvær vítaspyrnur voru flautaðar á fyrsta korteri seinni hálfleiks. Rancez kom Hamri í 4-1 á 51. mínútu og skömmu síðar minnkaði Helgi Valur Smárason muninn með marki af punktinum.
En sigur Hvergerðinga var ekki í hættu, þeir juku sóknarþungann og skoruðu þrjú mörk á síðustu 25 mínútunum. Rodrigo Depetris skoraði fimmta markið og þeir Rancez og Brynjólfur Þór Eyþórsson skoruðu sitthvort markið með mínútu millibili þegar tíu mínútur voru eftir. Þeir þremenningarnir hafa nú samtals skorað 42 mörk í deildinni.
Hamar er í 2. sæti deildarinnar með 31 stig en Rangæingar eru komnir í fallsæti, sitja í 9. sæti með 8 stig.