Selfoss vann stórsigur á botnliði Tindastóls þegar liðin mættust í 1. deild kvenna í knattspyrnu á Sauðárkróki í dag. Lokatölur urðu 1-6.
Védís Ösp Einarsdóttir kom Selfyssingum yfir strax á 6. mínútu og Magdalena Reimus tvöfaldaði forskotið á 29. mínútu. Tindastóll minnkaði muninn fimm mínútum síðar en Védís var aftur á ferðinni á 38. mínútu og tryggði Selfyssingum 1-3 forystu inn í leikhléið.
Embla Dís Gunnarsdóttir skoraði fjórða mark Selfoss á 58. mínútu og staðan var 1-4 þangað til varamaðurinn Ásdís Erla Helgadóttir kórónaði góðan leik Selfyssinga með tveimur mörkum á síðustu átta mínútum leiksins.
Selfoss lyfti sér upp í 4. sæti deildarinnar með 16 stig en Tindastóll er áfram á botninum með 3 stig.