KFR mætti KM og Stokkseyri heimsótti BF108 í C-deild Lengjubikars karla í knattspyrnu í kvöld. KFR vann stórsigur á meðan Stokkseyri fékk skell.
KFR og KM mættust á Selfossi og þar komst KM í 0-2 á upphafsmínútunum. Bjarni Þorvaldsson og Ævar Már Viktorsson jöfnuðu metin fyrir KFR en KM voru fljótir að komast yfir aftur, 2-3 á 41. mínútu.
Hasarinn í fyrri hálfleik var þó ekki búinn því Bjarni Þorvalds og Helgi Valur Smárason náðu báðir að skora á síðustu tveimur mínútum fyrri hálfleiks og staðan var 4-3 í leikhléi.
Seinni hálfleikur var markalaus allt fram á 78. mínútu að Hákon Kári Einarsson kom KFR í 5-3, KM minnkaði muninn rúmum fimm mínútum síðar en Helgi Valur átti lokaorðið, mínútu fyrir leikslok, og tryggði KFR 6-4 sigur.
Stokkseyri var í heimsókn á Víkingsvellinum hjá BF108. Heimaliðið reyndist töluvert sprækara í leiknum og staðan var 4-0 í hálfleik. BF108 komst í 6-0 í seinni hálfleik áður en Hafþór Berg Ríkharðsson minnkaði muninn fyrir Stokkseyri. BF108 átti hins vegar síðasta orðið og tvö mörk á lokakaflanum tryggðu þeim 8-1 sigur.
KFR og Stokkseyri leika bæði í riðli-3 í C-deildinni og þar eru KFR og BF108 á toppnum á meðan KM og Stokkseyri eru í botnsætunum.