ÍBU hefur framlengt samninginn við rúmenska markaskorarann George Rasvan og mun hann spila með Uppsveitum í nýrri 4. deild karla í knattspyrnu í sumar.
Þetta eru stórtíðindi og ánægjuleg fyrir Uppsveitamenn en Rasvan skoraði 43 mörk í 16 leikjum fyrir Uppsveitir á síðasta tímabili og var lang markahæsti leikmaður Íslandsmótsins.
Hann er þó ekki aðeins grimmur upp við markið heldur vinnusamur mjög og hleypur eins og stunginn grís í 90 mínútur ef þess gerist þörf, eins og það er orðað í fréttatilkynningu frá Uppsveitum.
Rasvan var eftirsóttur af öðrum liðum úr efri deildum eftir þetta frábæra gengi en hann valdi að endurnýja samninginn við ÍBU þar sem honum líður greinilega vel í sveitasælunni.