Það vantaði ekki mörkin í leiki kvöldsins í 4. deild karla í knattspyrnu. Árborg og Hamar unnu góða sigra á meðan KFR gerði jafntefli í sínum leik.
Árborg tók á móti Elliða á Selfossvelli en liðin eru í 3. og 4. sæti deildarinnar. Árborg gerði út um leikinn í fyrri hálfleik, en staðan var orðin 2-0 eftir fimm mínútur. David Dabrowski skoraði á 3. mínútu og tveimur mínútum síðar tvöfaldaði Þorsteinn Daníel Þorsteinsson forskot Árborgar. Sigurjón Reynisson bætti við marki á 30. mínútu og Þorsteinn Daníel var svo aftur á ferðinni á 37. mínútu. Magnús Hilmar Viktorsson lokaði fyrri hálfleiknum með marki á 43. mínútu og staðan var 5-0 í hálfleik. Leikurinn róaðist nokkuð í seinni hálfleik en Andrés Karl Guðjónsson skoraði fyrir Árborg á 76. mínútu og tryggði þeim 6-0 sigur.
Hamar heimsótti Álafoss á Varmá í Mosfellbæ. Guido Rancez skoraði tvö mörk á fyrstu níu mínútunum og Brynjólfur Þór Eyþórsson breytti stöðunni í 3-0 á 21. mínútu. Álafoss minnkaði muninn á 37. mínútu og staðan var 1-3 í hálfleik. Hvergerðingar höfðu áfram yfirburði í seinni hálfleik; Rodrigo Depetris skoraði á 55. mínútu og á þeirri 78. skoraði Brynjólfur aftur, 1-5. Genaro Peresutti átti svo lokaorðið, fimm mínútum fyrir leikslok og Hamar sigraði 1-6.
Það var mikil dramatík í Reykjaneshöllinni þar sem KFR var í heimsókn hjá Höfnum. Helgi Valur Smárason kom KFR yfir strax á 2. mínútu en Hafnir svöruðu fyrir sig með tveimur mörkum á fimm mínútna kafla og staðan 2-1 eftir rúman hálftíma. Bjarni Þorvaldsson sá hins vegar til þess að KFR leiddi í hálfleik, hann skoraði tvisvar á síðustu tíu mínútum fyrri hálfleiks og staðan var 2-3 í leikhléi. Helgi Valur kom KFR í góða stöðu með marki á 64. mínútu en heimamenn í Höfnum áttu lokaorðið, þeir skoruðu 3-4 á 81. mínútu og jöfnuðu svo metin á annarri mínútu uppbótartímans, lokatölur 4-4.
Staðan í 4. deildinni er þannig að Hamar er í 2. sæti með 18 stig, Árborg í 3. sæti með 16 stig og KFR í 6. sæti með 8 stig.