Ægir heimsótti Grindavík í kvöld í fall- og nágrannaslag í 1. deild karla í knattspyrnu. Þrátt fyrir ágæt tilþrif beggja liða tókst þeim ekki að skora og niðurstaðan varð 0-0 jafntefli.
Leikurinn var í járnum í fyrri hálfleik, bæði lið áttu fínar sóknir en sköpuðu lítið annað en hálffæri. Það breyttist reyndar á 37. mínútu þegar Grindvíkingar fengu langbesta færi leiksins en skutu framhjá opnu marki.
Grindavík var meira með boltann í seinni hálfleiknum en Stefan Dabetic stýrði Ægisvörninni eins og herforingi og lokaði á alla möguleika heimamanna.
Niðurstaðan markalaust jafntefli og Ægismenn sennilega sáttari aðilinn í leikslok. Staða liðanna breyttist ekki á töflunni, Ægir er í 11. sæti með 8 stig og Grindavík í því 10. með 9 stig.