Hjólreiðakeppnin Kia Gullhringurinn var haldin í fjórða sinn á Laugarvatni í gær en algjör sprenging var á fjölda þátttakenda í ár. Um það bil 700 keppendur hjóluðu af stað inn í kvöldið sem var fallegt í uppsveitunum í gærkvöldi.
Leiðin sem hjóluð er liggur frá Laugarvatni að Gullfossi og Geysi, beygt er inná Biskupstungnabraut og hún hjóluð alla leið að Þingvalla afleggjaranum í Grímsnesi, þaðan er hjólað að og yfir Lyngdalsheiði inn á Laugarvatn aftur, samtals um 106 kílómetrar. Aldrei hafa fleiri hjólreiðamenn hafið keppni á sama tíma en þeir nutu sannarlega stórbrotinnar náttúru uppsveitanna og veðurblíðunnar og komu allir heilir í mark þrátt fyrir nokkrar minniháttar skrámur.
Þau María Ögn Guðmundsdóttir HFR/Trek Örninn og Elvar Örn Reynisson HFR/Trek Örninn voru sigurvegarar dagsins. María Ögn, Íslandsmeistari og hjólreiðakona ársins 2014 er ósigruð í Kia Gullhringnum en hún hefur unnið öll fjögur árin sem keppnin hefur verið haldin. María sló eigið brautarmet frá árinu 2013 en þá hjólaði hún Gullhringinn á 2:59:27 en nýtt brautarmet hennar í ár er 2:59:08. Elvar Örn Reynisson kom fyrstur í mark í karlaflokki á glæsilegum tíma 2:50:44 sem um mínútu frá fyrra brautarmeti. Þetta er fyrsti sigur Elvars í A flokki keppninar.
Mikið var um dýrðir á Laugarvatni í gær en hálfgerð hjólreiðahátíð fór fram um allt þorpið og þegar mest var voru tæplega þrjú þúsund gestir á svæðinu. Sveitamarkaður, leiksvæði fyrir börnin, strandblakvöllur, vatnaboltar og sannkölluð sveitarómantík í loftinu.
Björgunarsveitarmenn frá Laugarvatni og Árborg gætu öryggis vegfarenda og keppenda og voru rástímar og framkvæmd keppninar unnin í náinni samvinnu við Vegargerðina og rekstraraðila á Laugarvatni sem tóku virkan þátt í undirbúningi og framkvæmd mótins sem að öllu leyti tókst frábærlega.
Eigendur og aðstandendur Kia Gullhringsins þakka einlæglega þann velvilja sem allir sýndu framkvæmd keppninar.