Knattspyrnudeild Selfoss samdi í morgun við Danijel Majkic um að leika með liðinu í 2. deildinni í sumar. Danijel er 32 ára Bosníumaður.
Hann æfði með liðinu í vikunni og spilaði í 2-1 sigri á Ægi í æfingaleik í morgun.
„Fyrstu dagarnir voru sérstakir hér og tók það mig smá tíma að venjast breyttum aðstæðum en þetta verður bara betra með hverjum deginum,“ segir Danijel í tilkynningu á Facebooksíðu Selfoss.
Hann getur leyst nokkrar stöður á vellinum í vörn og á miðju. Danijel hefur komið víða við á sínum ferli og spilað í löndum eins og Svíþjóð, Rússlandi, Líbíu og í heimalandinu, Bosníu.
„Ég hef í raun bara heyrt góða hluti um landið og fólkið. Leikmennirnir, þjálfararnir og fólkið í kringum félagið hefur verið frábært hingað til. Svo hefur heimsbyggðin fengið að fylgjast með uppgangi íslenska boltans undanfarin ár svo að ég ákvað að stökkva til og prófa að spila á Íslandi,“ sagði Danijel að lokum.