Kvennalið Selfoss vann magnaðan sigur á Íslandsmeisturum Vals þegar keppni hófst í úrvalsdeild kvenna í handbolta í dag. Liðin mættust að Hlíðarenda þar sem þær vínrauðu sigruðu 21-25.
Selfyssingar voru frábærar í fyrri hálfleiknum og fóru mikinn bæði í vörn og sókn. Selfoss hafði frumkvæðið frá fyrstu mínútu og náði mest sjö marka forskoti en staðan var 7-14 í hálfleik.
Valur skoraði fyrstu þrjú mörkin í seinni hálfleik en Selfyssingar létu ekki slá sig út af laginu heldur bættu í og náðu tíu marka forskoti, 14-24, þegar tíu mínútur voru eftir af leiknum. Það forskot dugði en Valur skoraði síðustu fimm mörk leiksins og náði að minnka muninn í fjögur mörk.
Hulda Hrönn Bragadóttir var besti maður vallarins í dag, hún skoraði 6 mörk fyrir Selfoss. Harpa Valey Gylfadóttir skoraði 5, Perla Ruth Albertsdóttir 5/1, Eva Lind Tyrfingsdóttir 3, Hulda Dís Þrastardóttir 3/3 og þær Emelía Ósk Aðalsteinsdóttir, Sylvía Bjarnadóttir og markvörðurinn Selma Þóra Jóhannsdóttir skoruðu allar 1 mark. Selma varði 9 skot og var með 30% markvörslu.