Selfoss tapaði óvænt gegn botnliði Magna þegar liðin mættust á Grenivík í 2. deild karla í knattspyrnu í dag.
Staðan var 0-0 í hálfleik en í seinni hálfleiknum fóru hlutirnir að gerast. Magnamenn skoruðu tvö mörk með þriggja mínútna millibili um hann miðjan en Viðar Örn Kjartansson náði að minnka muninn í 2-1 á 78. mínútu.
Það var hins vegar botnliðið sem átti lokaorðið. Heimamennirnir voru magnaðir á lokakaflanum, þeir komust í 3-1 á 83. mínútu og bættu svo fjórða markinu við á 89. mínútu. Lokatölur 4-1.
Selfoss er í 3. sæti deildarinnar með 15 stig en Magni er áfram á botninum, nú með 7 stig.