Íslandsmót karla í handbolta hófst í kvöld og ungt lið Selfoss fékk það verðuga verkefni að taka á móti Íslandsmeisturum Vals í Set-höllinn í 1. umferð. Það var þó engan bilbug að sjá á Selfyssingum sem mættu með kassann úti og Valsmenn þurftu að hafa fyrir 30-34 sigri.
Selfoss komst í 5-1 í upphafi leiks en Valsmenn jöfnuðu 5-5 þegar tæpar tíu mínútur voru liðnar. Eftir það var jafnt á flestum tölum og liðin skiptust á um að hafa frumkvæðið. Valsmenn náðu að skora þrjú mörk í röð þegar rúmar 20 mínútur voru liðnar og þeir héldu forystunni fram að hálfleik, 15-17 í leikhléi.
Selfyssingar byrjuðu seinni hálfleikinn vel og jöfnuðu 19-19 en Valsmenn svöruðu þá með fjórum mörkum í röð. Munurinn hélst í 3-4 mörkum lengi vel, Selfoss náði að minnka muninn 25-27 þegar tæpar 11 mínútur voru eftir af leiknum en þá bættu Íslandsmeistararnir í og juku forskotið aftur.
Hákon Garri Gestsson var markahæstur Selfyssinga með 7 mörk, Tryggvi Sigurberg Traustason skoraði 6/2, Valdimar Örn Ingvarsson 4, Ragnar Hilmarsson, Anton Breki Hjaltason, Sveinn Ísak Hauksson og Elvar Elí Hallgrímsson 3 og Árni Ísleifsson skoraði 1 mark.
Ísak Kristinn Jónsson og Alexander Hrafnkelsson vörðu báðir 5 skot í leiknum. Ísak var með 38% markvörslu og Alexander 16%.