„Maður þarf víst stundum að bíta í það súra“

„Ef ég vissi hvað klikkaði hjá okkur í kvöld þá hefðum við sennilega unnið leikinn,“ sagði Hallgrímur Brynjólfsson, þjálfari Hamars, svekktur eftir tapið gegn FSu.

„Við byrjum rosalega vel en í kjölfarið keyra þeir upp hraðann í leiknum. Það voru kannski aðeins fúnir fæturnir á okkur, ekki það að ég ætli að fara að afsaka eitthvað. FSu átti bara stórleik í kvöld og leikmenn og þjálfarateymið á þeim bænum eiga bara mikið hrós skilið,“ sagði Hallgrímur í samtali við sunnlenska.is eftir leik.

„Það eru forréttindi að fá að taka þátt í svona einvígi, eins og umgjörðin á þessu hefur verið, en það setur auðvitað svartan blett á það fyrir mig að þurfa að tapa þessu. En maður þarf víst að bíta í það súra stundum.“

FSu hafði gott forskot í 4. leikhluta en þá tóku Hvergerðingar mikinn endasprett og minnkuðu forskotið það mikið að skólapiltarnir voru farnir að svitna rækilega.

„Þetta er alveg eins og í leik tvö. Allt í einu þegar menn hafa engu að tapa þá keyra þeir allt í gang. Ég er ekki að segja að menn hafi ekki verið að reyna fram að því. Skotin voru ekki að detta hjá okkur og þetta var fjandi erfitt fyrir okkur á mörgum sviðum í kvöld. Það er erfitt að spila þessa vörn sem við spilum þegar máttarstólparnir finna sig ekki, það dregur aðeins sjálfstraustið úr vörninni,“ bætti Hallgrímur við og var áfram óspar á hrósið í garð andstæðinganna. „Við vorum að reyna að taka Ara út úr leiknum hjá FSu en hann var frábær í kvöld. Hlynur steig rosalega vel upp og Collin spilaði óaðfinnanlega framan af leiknum.“

Samningur Hallgríms við Hamar er úti og hann segist ekki vita hvort hann þjálfi í Hveragerði eða annarsstaðar á næsta tímabili, en hann hefur þjálfað bæði karla- og kvennalið félagsins í vetur. „Ég veit ekkert hvað framtíðin ber í skauti sér. Samningurinn minn er úti og ég bíð bara spenntur við símann, hvort sem það er Lárus sem hringir eða einhver annar,“ sagði Hallgrímur léttur að lokum.