Selfoss vann sinn fyrsta sigur í 2. deild karla í knattspyrnu í sumar þegar Kormákur/Hvöt kom í heimsókn á Selfossvöll í dag.
Þetta var hörkuleikur og stál í stál nánast allan tímann, fátt um færi – en fínir drættir inn á milli hjá báðum liðum.
Selfyssingar voru fyrri til að skora, Aron Fannar Birgisson kom þeim yfir með góðu skoti úr teignum á 25. mínútu og staðan var 1-0 í hálfleik.
Gestirnir gerðu sig líklega í upphafi seinni hálfleiks og þeir náðu að jafna metin á 67. mínútu eftir góða sókn. Staðan var 1-1 í tæpar fjórar mínútur því á 71. mínútu skoraði Jón Daði Böðvarsson sigurmarkið þegar boltinn hrökk til hans á auðum sjó í vítateignum.
Lokatölur 2-1 og Selfyssingar lyfta sér upp í 5. sæti deildarinnar með 4 stig.