Selfyssingar unnu öruggan sigur á HK í botnbaráttu Olísdeildar karla í handbolta í Kópavoginum í kvöld. Þetta var annar sigur Selfoss í deildinni í vetur og sá fyrsti síðan 28. september.
Selfoss hafði frumkvæðið frá upphafi og náði þriggja marka forskoti á upphafsmínútunum. HK jafnaði 7-7 þegar rúmar tuttugu mínútur voru liðnar af leiknum en þá tóku Selfyssingar aftur við sér og fóru með þriggja marka forskot inn í leikhléið, 9-12.
Sigur Selfoss var aldrei í hættu í seinni hálfleiknum. Þeir leiddu með nokkrum mörkum allan tímann og náðu mest sex marka forskoti. Lokatölur urðu 23-28.
Selfoss lyfti sér upp í 8. sæti deildarinnar með sigrinu en liðið er með fjögur stig að loknum sex umferðum.
Richard Sæþór Sigurðsson var markahæstur Selfyssinga með 7 mörk, Hergeir Grímsson skoraði 6/3, Einar Sverrisson 5, Elvar Elí Hallgrímsson 3, Guðmundur Hólmar Helgason og Alexander Egan 2 og þeir Gunnar Flosi Grétarsson, Árni Steinn Steinþórsson og Ragnar Jóhannsson skoruðu allir 1 mark. Alexander Hrafnkelsson varði 9/1 skot í marki Selfoss og var með 39% markvörslu og Sölvi Ólafsson varði 6 skot og var með 40% markvörslu.