Á morgun, laugardag fer fram fimmta og síðasta umferð ársins í Íslandsmótinu í rallý. Eknar verða fjórar sérleiðir í nágrenni Langjökuls, þ.e. á Skjaldbreiðarvegi og Kaldadal.
Búast við hörku keppni þar sem staða í Íslandsmótinu er mjög jöfn í öllum flokkum. Til leiks eru skráðar tólf áhafnir og er ljóst eftir dramatík síðustu tveggja umferða að búast má við miklum átökum. Þannig tókst einungis helmingi þátttakenda að ljúka síðustu keppni þar sem Skjaldbreiðarvegur reyndist mönnum meðal annars erfiður.
Íslandsmeistararnir frá í fyrra, Baldur Haraldsson og Aðalsteinn Símonarson, leiða stigakeppni Íslandsmótsins, en einungis ein áhöfn hefur möguleika á að ná þeim að stigum. Það eru systkinin Daníel og Ásta Sigurðarbörn sem mæta á nýinnfluttum, öflugum Subaru Imprezaí þessa keppni og ætla þau sér sigur. Öruggt má telja að þessar áhafnir muni berjast um verðlaunasæti í keppninni en Baldri og Aðalsteini nægir 6. sæti á laugardag til að hampa Íslandsmeistaratitlinum, þó Daníel og Ásta sigri.
Í jeppaflokki eru efst til Íslandsmeistara feðginin Sighvatur Sigurðsson og Anna María Sighvatsdóttir. Skammt á hæla þeim eru þeir Þorkell Símonarson og Þórarinn K. Þórarinsson Eru báðar áhafnir skráðar til leiks og öruggt að hvorug mun gefa sekúndu eftir í baráttunni.
Í flokki bíla án túrbínu leiða Baldur Hlöðversson og Hanna Rún Ragnarsdóttir Íslandsmótið en fast á eftir þeir eru hjónin Ólafur Þór Ólafsson og Tinna Rós Vilhjálmsdóttir. Ætlun þeirra var einungis að taka þátt í einni keppni á árinu sér til ánægju og yndisauka en árangurinn varð slíkur að þau mæta til leiks enda komin í hörku baráttu.
Fyrsti bíll verður ræstur inn á Skjaldbreiðarveg til vesturs kl. 10:00 og síðan kl. 11:10 inn á Kaldadal til norðurs. Kl. 11:50 er Kaldidalur ekinn til baka og Skjaldbreiðarvegur í austur kl. 13:00.
Samansöfnun að ralli loknu verður á planinu hjá Samkaupum á Laugarvatni. Úrslit verða kynnt kl. 14:45.