Hestamannafélagið Sleipnir hélt uppskeruhátíð eldri flokka í félagsheimilinu Hliðskjálf síðastliðinn laugardaginn, þar sem félagsmenn voru heiðraðir fyrir árangur sinn á árinu 2026.
Viðurkenningar fyrir stigahæstu knapa félagsins í hringvallargreinum komu í hlut Glódísar Rúnar Sigurðardóttur, sem var valin íþróttaknapi ársins, og Guðmundu Ellenar Sigurðardóttur, sem hlaut titilinn gæðingaknapi ársins eftir afar gott keppnistímabil.
Veittar voru viðurkenningar fyrir bestu tíma í skeiðgreinum. Í 100 m skeið áttu Sigursteinn Sumarliðason og Liðsauki frá Áskoti besta tímann, 7,64 sek. Í 150 m skeiði voru það Larissa Silja Werner og Hylur frá Kjarri á 14,93 sek og í 250 m skeiði voru það Páll Bragi Hólmarsson og Snjall frá Austurkoti á 22,35 sek. Páll Bragi hlaut jafnframt viðurkenningu fyrir Íslandsmeistaratitil í greininni.
Einnig voru veitt verðlaun til knapa ársins í ungmenna- og áhugamannaflokki. Þar hlutu viðurkenningar Viktor Óli Helgason sem knapi ársins í ungmennaflokki og Þórdís Sigurðardóttir knapi ársins í áhugamannaflokki.
Á sviði ræktunar var sérstakur árangur Sleipnisfélaga heiðraður. Ræktendur hryssunnar Hugsýnar frá Ketilsstöðum, Bergur Jónsson og Olil Amble, fengu viðurkenningu fyrir heimsmetshryssuna sem varð hæst dæmda hryssa frá upphafi kynbótadóma. Þá hlaut Malin Widarsson Ræktunarbikar Sleipnis fyrir stóðhestinn Safír frá Laugardælum sem hlaut hæstu aðaleinkunn sem íslenskur hestur hefur fengið í kynbótadómi.
Sleipnisskjöldurinn, ein merkasta viðurkenning félagsins, kom að þessu sinni í hlut gæðingsins Ýrar frá Selfossi eftir sigur í A-flokki á gæðingamóti Sleipnis. Klárhestaskjöldur Sleipnis var afhentur fyrir Þröst frá Kolsholti 2 sem sigraði B-flokk gæðinga á gæðingamóti félagsins.
Á uppskeruhátíðinni voru einnig heiðraðir félagsmenn ársins 2026. Viðurkenningin kom í hlut Jóns Þórs Tómassonar og Bryndísar Guðmundsdóttur fyrir ómetanlegt framlag þeirra til félagsstarfs, uppbyggingar og sjálfboðaliðastarfa innan Sleipnis.
Sérstök athygli vakti að sjö knapar úr röðum Sleipnis voru valdir í landsliðsverkefni Íslands fyrir Heimsmeistaramótið 2027, sem undirstrikar þann sterka árangur sem félagið hefur náð á undanförnum árum. Í tilefni þess ákvað stjórn Sleipnis að veita þeim styrki úr Afrekssjóði félagsins. Í U-21 árs landsliðinu eru það þau Elsa Kristín Grétarsdóttir og Loftur Breki Hauksson og í A-landsliðinu þau Glódís Rún Sigurðardóttir, Guðmunda Ellen Sigurðardóttir, Haukur Baldvinsson, Védís Huld Sigurðardóttir og Sigursteinn Sumarliðason.
Hápunktur kvöldsins var útnefning Lofts Breka Haukssonar sem knapa ársins hjá Sleipni. Viðurkenningin er veitt þeim knapa sem stendur efstur í samanlögðum stigaútreikningi félagsins yfir keppnistímabilið og þótti árangur Lofts Breka á árinu vera einstakur.
Loftur Breki varð Íslandsmeistari í T1 unglingaflokki með Fylkingu frá Austurási, sigraði T1 í Meistaradeild Líflands og æskunnar og vann einnig T1 unglingaflokk á Reykjavíkurmeistaramótinu. Á Landsmóti hestamanna vann hann til silfurverðlauna í sterku unglingaflokki með Fannari frá Blönduósi og bætti enn við verðlaunasafnið með silfri í fimmgangi og bronsi í gæðingaskeiði á Íslandsmeistaramóti barna og unglinga. Stigasöfnun Lofts Breka dugði til að verða stigahæstur allra knapa Sleipnis á árinu, óháð aldri og keppnisflokki.
Í rökstuðningi Sleipnis kom jafnframt fram að Loftur Breki væri ekki aðeins framúrskarandi keppnisknapi heldur einnig fyrirmynd innan félagsins. Hann hafi sýnt hestum sínum og íþróttinni virðingu, verið kurteis, stundvís og komið fram af prúðmennsku bæði innan vallar og utan. Þeir eiginleikar, samhliða glæsilegum árangri, hafi gert hann að verðskulduðum handhafa titilsins Knapi ársins 2026. Þrátt fyrir ungan aldur er Loftur Breki þegar orðinn einn fremsti knapi félagsins og framtíð hans í hestamennsku talin afar björt. Val hans sem Knapa ársins er því ekki aðeins viðurkenning fyrir afrek ársins 2026 heldur einnig staðfesting á þeirri sterku stöðu sem hann hefur þegar skapað sér innan íslenskrar hestamennsku.