Blómahlaupið var haldið í fyrsta sinn og fékk það frábærar móttökur Hvergerðinga. Bæjarmálafélagið Okkar Hveragerði stóð fyrir hlaupinu og er stefnt að því að halda það árlega.
Pétur G. Markan, bæjarstjóri Hveragerðis og Lárus Jónsson, oddviti Okkar Hveragerðis, ræstu hlaupið í litadýrð við mikla gleði hlaupara, barna og fullorðinna. Eftir hlaupið svaraði Pétur bæjarstjóri spurningum barnanna um lýðræðið og tók við áríðandi skilaboðum frá börnunum fyrir komandi kjörtímabil; Öll hús í Hveragerði eiga að vera Tívolíleiksvæði fyrir börn þar sem öll börn geta leikið sér og verið glöð. Niðurstaðan úr samræðum bæjarstjóra og barnanna var sú að fallegasti og skemmtilegasti leikurinn er kærleikurinn og eiga allir, fullorðnir og börn, að leika sér í þeim leik alltaf, alla daga.
Sigurvegarar í 10 km hlaupi voru Halldór Smárason og Ívar Sæland en sigurvegarar í skemmtihlaupinu voru þeir Aron Vignisson 9 ára, Sindri Hrafn Alexandersson 6 ára og Þórsteinn Alex Atlason 5 ára.
Í tilkynningu frá Okkar Hveragerði eru allir Hvergerðingar hvattir til að kynna sér málefni allra framboða en með því vill Okkar Hveragerði hvetja til lýðræðislegrar og málefnalegar þátttöku í sveitarstjórnarkosningunum þar sem fólk kynnir sér vandlega öll framboð og kýs með hjartanu.
