Líf og fjör í frjálsíþróttaskólanum

Það var líf og fjör á frjálsíþróttavellinum á Selfossi dagana 8. til 12. júlí þar sem 40 börn og unglingar víðsvegar að af landinu tóku þátt í Frjálsíþróttaskóla UMFÍ.

Þetta er í fimmta skipti sem skólinn er haldinn á HSK svæðinu og var þátttakan í ár um það bil tvöfalt meiri en verið hefur fyrri ár. Skólinn er fyrir krakka á aldrinum 11 til 18 ára og er haldinn á fimm stöðum um landið ár hvert. Umsjónarmenn skólans á Selfossi voru Ágústa Tryggvadóttir og Fjóla Signý Hannesdóttir en alls störfuðu tíu þjálfarar og aðstoðarmenn við skólann í sumar.

Í skólanum fóru krakkarnir í allar helstu greinar frjálsíþrótta og að auki eru ýmsir skipulagðir atburðir svo sem ratleikir, spurningakeppni, frjálsíþróttamót o.fl. Íþróttasvæðið á Selfossi er upplagt fyrir skóla af þessu tagi, þar sem stutt er á milli frábærs íþróttavallar og góðrar sundalaugar.

Skólinn endaði svo með litlu frjálsíþróttamóti og pylsuveislu þar sem viðkenningaskjöl fyrir skólann voru veitt.

Skólinn heppnaðist mjög vel með góðri skipulagningu og góðri aðstoð fyrirtækja. Umsjónarmenn skólans vilja þakka öllum þeim fjölda fyrirtækja sem lögðu þeim lið, en þau voru: MS, Kjúklingabúið Vor, Hafnarnes-Ver, Bónus, Nettó, Almarsbakarí, Guðnabakari, Sölufélag garðyrkjumanna, Kjörís, Myllan, Nathan&Olsen, HP, Krás og Valgerður á Húsatóftum.