Frjálsíþróttalið HSK/Selfoss 11-14 ára gerði góða ferð í Borgarnes um síðustu helgi þar sem það keppti á Meistaramóti Íslands. Liðið gerði sér lítið fyrir og varð Íslandsmeistari, vann stigakeppnina með 397,5 stigum þar sem lið Ármanns lenti í 2. sæti með 348 stig og Breiðablik í því 3. með 265 stig.
Þrír flokkar urðu jafnframt Íslandsmeistarar í sínum aldursflokki þar sem að 11 og 12 ára stúlkur unnu flokkinn sinn og einnig 14 ára piltar.
Keppendur HSK/Selfoss voru ötul að fara á verðlaunapall og fjölmargar bætingar litu dagsins ljós. Fimm einstaklingar nældu sér í Íslandsmeistaratitil í einstaklingsgreinum og eitt HSK met var sett.
11 og 12 ára krakkarnir kepptu í fjölþraut og segja má að HSK/Selfoss hafi heldur betur skarað fram úr í piltaflokki 11 ára og stúlknaflokki 11 og 12 ára þar sem krakkarnir voru iðulega efst í greinum. 10 efstu í þrautinni komust á pall og töldu til stiga.
11 ára flokkur: Andri Eldon Hreinsson, Laugdælum, setti HSK met í 400 m hlaupi 11 ára pilta er hann hljóp á 69,74 sek og var það hraðasti tíminn í flokknum. Andri bætti héraðsmet nafna síns, Andra Más Óskarssonar, Umf. Selfoss um 2,34 sek. Andri Eldon stökk einnig lengst allra í langstökki (3,98 m) og endaði annar í þrautinni með 4.966 stig. Helga Þórbjörg Birgisdóttir, Selfossi vann þrjár greinar innan þrautarinnar er hún kastaði spjótinu 23,83m, stökk 3,82 m í langstökki og stökk svo 1,17 m í hástökki og varð Íslandsmeistari í fjölþraut 11 ára stúlkna og fékk hún 5.313 stig. Helga Marín Lárusdóttir, Selfossi kastaði lengst allra í kúluvarpi (8,08 m) og endaði í 4. sæti í þrautinni og Ingibjörg Lára Rúnarsdóttir, Selfossi kom fyrst í mark í 400 m hlaupi er hún hljóp á 75,27 sek og náði svo 2. sæti í fjölþrautarkeppninni. Erna Huld Elmarsdóttir, Selfossi náði einnig á pall en hún endaði í 9. sæti í þrautinni.
12 ára flokkur: Karólína Orradóttir, Dímon hljóp hraðast allra stúlkna í 60 m spretthlaupi (9,18 sek) og stökk einnig lengst í langstökki (4,09 m) og endaði í 2. sæti í fjölþrautinni. Berglind Arna Garðarsdóttir, Þór í Þorlákshöfn stökk hæst allra stúlkna í hástökki er hún vippaði sér yfir 1,37m og lenti svo í 10. sæti í þrautarkeppninni. Auk Karólínu og Berglindar voru það Þorbjörg Helga Björgvinsdóttir, Heklu sem endaði í 3. sæti í þrautinni og fór því á pall og einnig Þórey Alfreðsdóttir, Þór í Þorlákshöfn sem endaði í 9. sæti.
13 ára flokkur: Bjarkey Sigurðardóttir, Selfossi, nældi sér í silfur í bæði 800 (3:04,7 mín) og 2.000 m hlaupi (8:42,80 mín) og að auki fékk hún brons í spjótkasti með kast upp á 22,33 m. Hilmir Dreki Guðmundsson, Selfossi, fékk silfur í þrístökki (8,78m) í piltaflokki og brons í bæði kúluvarpi (9,28) og kringlukasti (22,22m).
14 ára flokkur: Í stúlknaflokki varð Sigríður Elva Jónsdóttir Selfossi fyrst allra í mark í 80 m spretthlaupi er hún hljóp á tímanum 11,05 sek. Hún fékk einnig brons í 300 m hlaupi (48,71 sek), 300 m grindahlaupi (54,83 sek) og 800 m hlaupi (2:45,19 mín). Bergrún Eyland Gunnarsdóttir, Dímon, fékk brons í kúluvarpi (8,73 m) og Þórhildur Salka Jónsdóttir, Selfossi, fékk brons í spjótkasti (28,68 m). Í piltaflokki kom Andri Fannar Smárason, Selfossi, fyrstur í mark í 80 m grindahlaupi er hann hljóp á 15,09 sek. Kristján Karl Gunnarsson Selfossi var með stórbætingu í spjótkasti þegar spjótið flaug 44,04 m sem skilaði honum Íslandsmeistaratitli nokkuð örugglega og hann fékk einnig brons í langstökki (4,61 m). Kristján Reynisson, kastaði kringlunni 27,04 m og fékk brons fyrir. 14 ára piltarnir fengu líka gull í 4×100 m boðhlaupi en sveitin var skipuð þeim Andra Fannari, Kristjáni Karli, Kristjáni Reynis og Ottó Inga Annýjarsyni, Þjótanda og hlupu þeir á 58,70 sek.