Opnunarhringurinn á Selsvelli í Hrunamannahreppi var spilaður í gær í björtu veðri og svölu. Öldungarnir Helgi Guðmundsson, Kristján Skarphéðinsson og klúbbmeistarinn Agnar Reidar Róbertsson fóru fyrstir inná sumarflatirnar.
Og það var létt yfir mannskapnum og eftirvænting í loftinu, sumarið komið og kylfingar gleðjast. Ottó Leifsson, formaður, er spenntur fyrir nýju tímabili hjá Golfklúbbnum Flúðum og segir opnunina í gær upphafið að einhverju miklu stærra heldur en bara frábærum púttum og týndum boltum.
Sumarflatirnar eru tilbúnar, brautirnar eru að hrista af sér frostið og teigarnir farnir að vaxa. Vallarnefndin og vallarstarsfsmenn eru búnir að leggja sig fram síðustu daga en einungis vinnutengt tæki og bílar mega fara um völlinn að sinni og almenn notkun golfbíla ekki leyfð.
Í dag mætti einnig nýr rekstrarstjóri til starfa hjá Golfklúbbnum Flúðum, Einar Lárus Ragnarsson. Hann mun stýra skrifstofunni og vera hluti af heildarstarfsmönnum golfklúbbsins. Matreiðslumeistarinn Guðmundur Rúnar opnaði einnig eldhúsið í gær. Hann er reynslunni ríkari frá fyrra ári og strax byrjaður með nýjungar í veitingasalnum, t.d. hlaðborð í hádeginu og á kvöldin.
