Selfoss 2 tók á móti HK 2 í 1. deild karla í handbolta í Set-höllinni Iðu í dag. Eftir magnaða tvo síðustu leiki hjá Selfoss 2 kipptu HK-ingar þeim niður á jörðina í dag og unnu öruggan sigur.
Byrjunin var afleit hjá Selfyssingum í dag og þeir voru komnir í brekku eftir tæpar fimm mínútur en þá var staðan orðin 1-7 fyrir HK. Selfyssingar tóku leikhlé og stilltu saman strengi sína og náðu í kjölfarið að minnka muninn í 8-11. HK var með frumkvæðið á lokamínútum fyrri hálfleiks og staðan í leikhléi var 16-19.
Í seinni hálfleiknum var leikurinn í öruggum höndum HK-inga og Selfyssingar náðu ekki að ógna þeim að ráði. Að lokum skildu sex mörk liðin að, 33-39.
Aron Leo Guðmundsson var markahæstur Selfyssinga með 12 mörk, Dagur Rafn Gíslason skoraði 5, Dagbjartur Máni Björnsson og Skarphéðinn Steinn Sveinsson 4, Bjarni Valur Bjarnason og Ragnar Hilmarsson 2 og þeir Þorleifur Tryggvi Ólafsson, Kristján E. Kristjánsson, Hilmar Bjarni Ásgeirsson og Eyþór Ingi Ingvarsson skoruðu 1 mark hver.
Ísak Kristinn Jónsson varði 11 skot í marki Selfoss 2 og Egill Eyvindur Þorsteinsson 1.
Selfoss 2 er í 7. sæti deildarinnar með 18 stig en HK 2 er í 10. sæti með 10 stig.