Sjónvarpsstöðin Hringbraut og Íslenskur toppfótbolti hafa gengið frá samkomulagi þess efnis um að Lengjudeild karla í knattspyrnu verði með heimili á Hringbraut í sumar.
Hringbraut var með markaþátt eftir hverja umferð í Lengjudeild karla á síðasta ári og verður sami háttur á í ár. Að auki verður einn leikur úr hverri umferð í beinni útsendingu á Hringbraut sem er í opinni dagskrá.
Því verður um að ræða 22 beinar útsendingar frá leikjum Lengjudeildarinnar og 22 markaþætti þar sem farið verður yfir alla leikina í hverri umferð.
„Við erum mjög spennt fyrir þessu samstarfi, síðasta sumar var góð reynsla en meira verður lagt í hlutina í ár. Lengjudeild karla verður eina deildarkeppnin á Íslandi sem er í opinni dagskrá. Það er mikið af stórum félögum í deildinni og við eigum von á skemmtilegu sumri. Það verður gaman að geta boðið fólkinu í landinu upp á beinar útsendingar í opinni dagskrá,“ segir Hörður Snævar Jónsson, fréttastjóri íþróttadeildar Torgs.
Í 3. umferð deildarinnar, þann 20. maí næstkomandi, verður leikur Aftureldingar og Selfoss í beinni útsendingu á Hringbraut.