Annað bikarmót vetrarins hjá Taekwondosambandi Íslands var haldið í Blue-höllinni í Keflavík um síðustu helgi. Selfyssingar komu hlaðnir verðlaunum af mótinu.
Á laugardeginum var keppt í formum og þar vann Laufey Ragnarsdóttir til gullverðlauna í einstaklings A flokki junior kvenna ásamt því að vera valin kona mótsins. Veigar Elí Ölversson fékk bronsverðlaun í einstaklings A flokki junior karla og Ivan Berkis vann til gullverðlauna í einstaklings C flokki minior karla.
Á sunnudeginum var keppt í bardaga og þar vann Ivan önnur gullverðlaun helgarinnar er hann sigraði í -27 kg B flokki karla. Björn Jóel Björgvinsson fékk silfurverðlaun -80 kg A flokki karla, Veigar Elí fékk silfurverðlaun í -63 kg A flokki karla og Benjamín Emil Símonarson fékk silfurverðlaun í -41 kg flokki karla.
