27. Landsmóti UMFÍ var slitið á íþróttavellinum á Selfossi síðdegis í dag. Heimamenn í Héraðssambandinu Skarphéðni unnu heildarstigakeppni mótsins með yfirburðum.
HSK fékk 3.896 stig í heildarstigakeppninni en Ungmennasamband Kjalarnesþings varð í öðru sæti með 1.844 stig. Íþróttabandalag Reykjavíkur varð í 3. sæti með 1152,5 stig.
Þórir Haraldsson, formaður framkvæmdanefndar landsmótsins, flutti þakkarávarp og þær Ásta Stefánsdóttir, framkvæmdastjóri Árborgar og Helga Guðrún Guðjónsdóttir, formaður UMFÍ, afhjúpuðu síðan þakkarskjöld á bautasteininum við frjálsíþróttavöllinn, þar sem landsmótanna á Selfossi er minnst. Ásta færði svo framkvæmdaaðilum mótsins þakkir fyrir samvinnuna og keppendum og starfsfólki sömuleiðis fyrir góða helgi.
Að því loknu voru afhent verðlaun í heildarstigakeppni í starfsíþróttum og íþróttum fatlaðra en þar sigruðu lið HSK á báðum vígstöðvum. Guðríður Aadnegard, formaður HSK, tók síðan við sigurlaununum í heildarstigakeppni mótsins.
Helga Guðrún sleit síðan mótinu, Hvítbláinn var dreginn niður á meðan þjóðsöngurinn var leikinn og landsmótseldurinn var síðan slökktur.
UMFÍ hefur ekki tilkynnt hvar eða hvenær næsta landsmót verður haldið.