Landsmót UMFÍ 50+ árið 2027 verður haldið á Hellu, samkvæmt ákvörðun stjórnar UMFÍ á dögunum. Þetta verður í annað sinn sem mótið er haldið á sambandssvæði HSK, en Landsmót 50+ árið 2017 var í Hveragerði.
Á síðasta ári óskaði stjórn Umf. Heklu eftir því við Héraðssambandið Skarphéðinn að lögð yrði inn umsókn þess efnis að Landsmót 50+ árið 2027 verði haldið á Hellu í Rangárþingi ytra. Stjórn HSK samþykkti að sækja um mótið, en óskaði eftir staðfestingu sveitarstjórnar Rangárþings ytra um að sveitarfélagið sé tilbúið að koma að mótshaldinu með HSK. Sveitarstjórn Rangárþings ytra samþykkti á fundi í september 2025 að standa að umsókn með HSK. Sú þriðja á fimm árum, en sótt var um að halda mótið á Hellu árin 2021 og 2025.
Í umsókn um mótið kemur fram að á Hellu sé ágæt íþróttaaðstaða og staðurinn henti vel fyrir Landsmót 50+. Mótshaldið yrði með svipuðu sniði og undanfarin ár og mikill hugur sé í heimamönnum á Hellu að sjá um framkvæmd mótsins. Ljóst er að ekki verður hægt að hlaupa spretthlaup og hringhlaup á gamla vellinum á Hellu, þar sem völlurinn hefur verið tekinn undir viðbyggingu grunnskólans á staðnum og framkvæmdir við nýjan leikskóla eru hafnar. Aðstaða fyrir kastgreinar og stökkgreinar er til staðar.
Landsmót UMFÍ 50+ hafa verið haldin frá árinu 2011. Markmið mótsins hefur frá upphafi verið að skapa vettvang fyrir fyrir aldurshópinn 50 ára og eldri til þess að koma saman, njóta þess að vera í góðum félagsskap og keppa í fjölda íþróttagreina. Mótið er öllum opið sem verða 50 ára á árinu og eldri. Þátttaka er á eigin forsendum og ekki þarf að vera skráður í íþróttafélag.
Næsta Landsmót UMFÍ 50+ fer fram í Hrafnagilshverfi, á Akureyri og Dalvík dagana 26.–28. júní næstkomandi.