„Það er geggjað að fá þessar flottu fyrirmyndir í Verdensholdet í fimleikasalinn. Þau eru svo opin og tilbúin að vera með okkur í öll því sem þarf og ná vel til iðkendanna,“ segir Bergþóra Ingvarsdóttir, framkvæmdastjóri fimleikadeildar Selfoss.
Danski sýningahópurinn Verdensholdet kom til landsins á miðvikudagsmorgun eftir langt ferðalag frá Suður-Ameríku og hélt beint til Selfoss. Þar var þeim tekið vel, meðal annars með léttum hádegisverði í Sunnulækjarskóla áður en þau kynntu sér aðstæður í fimleikasalnum og fóru að æfa.
„Það hefur verið ótrúlega gaman að taka á móti þeim,“ segir Bergþóra. „Þau voru glöð að vera komin hingað eftir langt ferðalag og hafa þegar náð góðri æfingu í salnum hjá okkur. Þau fóru líka á æfingu í GYM 800 og í sundferð í Sundhöll Selfoss, sem sveitarfélagið Árborg bauð upp á. Svo var þeim boðið í mat á sveitabæ sem einn þjálfarinn okkar á. Þar fengu þau saltkjöt, hangikjöt og svið og fleira að borða,“ bætir hún við og leggur áherslu á að stuðningur sveitarfélagsins og GYM 800 hafi verið mjög góður.
Verdensholdet heyrir undir DGI (Danmarks Gymnastik og Idrætsforeninger), sem eru eins konar systursamtök UMFÍ í Danmörku.
Fimleikahópurinn Verdensholdet samanstendur af 28 einstaklingum (14 konum og 14 körlum) auk þjálfara og starfsmanna og munu þau dvelja hér á landi til 27. mars. Hópurinn er hér á landi á vegum UMFÍ, í samstarfi við Fimleikasamband Íslands (FSÍ) og fimleikafélög á ýmsum stöðum.
Gista hjá íbúum
Verdensholdet-hópurinn hefur verið á ferðalagi um allan heim og leita meðlimir hans eftir því að gista hjá landsmönnum á hverjum stað. Það sama er uppi á teningnum á Selfoss. Af þessum sökum er hópurinn nokkuð dreifður á Selfossi en fær fínasta tækifæri til að upplifa íslenskt heimilislíf. Bergþóra segir það ganga ótrúlega vel.
Stórsýning í Garðabæ
Selfoss fyrsti áfangastaður Verdensholdet. Auk þess að halda æfingar og vinnustofur og kynna sér lífið á hverjum stað þá heldur hópurinn 30 mínútna sýningar þar sem hann stoppar. Sýning Verdensholdet á Selfossi verður í íþróttahúsinu Baulu í dag, laugardaginn 7. mars klukkan 17:00. Bergþóra tekur fram að öllu verður til tjaldað í Baulu.
„Húsið er ekki stórt. Við drögum stúkuna fram en síðan þarf fólk að sitja allt um kring í salnum.“
Í Garðabæ verður síðan stórsýning föstudaginn 13. mars klukkan 18:00 í íþróttahúsinu Ásgarði. Búist er við miklum fjölda fólks þangað, forsetahjónin hafa boðað komu sína sem og danski sendiherrann.