Kristrún íþróttamaður Hveragerðis 2018

Kristrún Rut Antonsdóttir í leik með Roma. Ljósmynd ⓒ Fabio Cittadini

Kristrún Rut Antonsdóttir, knattspyrnukona hjá Roma á Ítalíu, var kjörin íþróttamaður ársins í Hveragerði árið 2018.

Kjörinu var lýst við athöfn á Listasafni Árnesinga í dag. Níu íþróttamenn voru í kjöri og hafa þeir allir sýnt mikinn metnað til að ná langt í sinni íþróttagrein og eru svo sannarlega góð fyrirmynd fyrir bæinn og yngri íþróttamenn.

Kristrún lék fyrri hluta árs með ítalska liðinu Chieti þar sem hún var lykilleikmaður liðsins. Í vor kom hún til Íslands og spilaði með Selfoss í Pepsideildinni, þar sem hún spilaði 10 leiki og skoraði 2 mörk. Í lok sumars lá leiðin aftur til Ítalíu þar sem hún samdi við Roma og hefur staðið sig vel þar en liðið er í 6. sæti í Serie-A, efstu deild á Ítalíu.

Þeir íþróttamenn sem voru í kjöri til íþróttamanna ársins 2018 voru:
Arnar Dagur Daðason, körfuknattleiksmaður ársins 2018
Fannar Ingi Steingrímsson, golfari ársins 2018
Hekla Björt Birkisdóttir, fimleikakona ársins 2018
Helga Sóley Heiðarsdóttir, körfuknattleikskona ársins 2018
Kristján Valdimarsson, blakmaður ársins 2018
Kristrún Rut Antonsdóttir, knattspyrnukona ársins 2018
Rakel Hlynsdóttir, lyftingakona ársins 2018
Stefán Þór Hannesson, knattspyrnumaður ársins 2018
Úlfar Jón Andrésson, íshokkímaður ársins 2018

Þá fengu 25 íþróttamenn viðurkenningu fyrir Íslands- og bikarmeistaratitla á árinu, eða fyrir að keppa fyrir Íslands hönd með landsliðum í ýmsum greinum.

Verðlaunahafar á hátíðinni í dag. Kristrún var stödd í Róm en Hlín Guðnadóttir tók við viðurkenningunni fyrir hennar hönd. Ljósmynd/Aðsend