Það var mikil dramatík í leik Kríu og Stokkseyrar í 5. deild karla í knattspyrnu á Seltjarnarnesinu í kvöld. Stokkseyringar áttu undir högg að sækja lengst af en náðu að tryggja sér stig á lokasekúndunum.
Kría skoraði fyrsta markið strax á 1. mínútu og þeir tvöfölduðu svo forskotið korteri síðar. Hafþór Berg Ríkarðsson minnkaði muninn á 26. mínútu en Krían átti lokaorðið í fyrri hálfleik. Þeir bættu þriðja markinu við á 44. mínútu og staðan var 3-1 í hálfleik.
Leikurinn var í járnum í seinni hálfleik en hagur Stokkseyringa vænkaðist á síðustu tuttugu mínútunum. Davíð Örn Aitken Sævarsson og Marteinn Maríus Marinósson skoruðu og jöfnuðu 3-3. En fjörið var ekki búið, Kría komst aftur yfir á 84. mínútu en Kristófer James Eggertsson kom til bjargar á 90. mínútu, hann jafnaði 4-4 og tryggði Stokkseyri stig.
Staðan í B-riðlinum er þannig að Stokkseyri er í 2. sæti með 18 stig en Kría er í 6. sæti með 11 stig.