Ægismenn eru komnir í 32-liða úrslit bikarkeppni karla í knattspyrnu þetta sumarið eftir 2-0 sigur gegn Reyni Sandgerði í dag.
Vegna slæmrar veðurspá var leikurinn fluttur inn í lognið í knatthúsi Hauka í Hafnarfirði. Liðin voru ekki að finna netmöskvana lengi vel, staðan var 0-0 í hálfleik, og Ægismenn tryggðu sér sigurinn í blálokin.
Kristinn Ásgeir Þorbergsson kom inná sem varamaður í hálfleik og hann lét heldur betur að sér kveða. Hann kom Ægismönnum yfir tveimur mínútum fyrir leikslok og hann var svo aftur á ferðinni í blálok uppbótartímans og tryggði Ægi 2-0 sigur.
Ægir, sem leikur í 1. deildinni, mætir 3. deildarliði Árbæjar á útivelli í 32-liða úrslitunum um næstu helgi.