Kristinn Þór Íslandsmeistari í 800m hlaupi

Kristinn Þór Kristinsson, HSK/Selfoss, varð Íslandsmeistari í 800 m hlaupi karla á Meistaramóti Íslands í frjálsum íþróttum sem haldið var á Sauðárkróki um helgina.

HSK/Selfoss sendi sautján keppendur til leiks sem stóðu sig allir með miklum sóma.

Kristinn Þór stóð sig mjög vel og hljóp 800 metrana á tímanum 1:52,50 mín. Hann krækti sér einnig í silfur í 1.500 m hlaupi eftir æsispennandi hlaup þar sem mjög mjótt var á mununum á fyrsta og öðru sæti. Kristinn hljóp á tímanum 4:05,65 mín.

Fjóla Signý Hannesdóttir mætti á brautina og sýndi og sannaði að hún er komin til baka eftir barnsburð. Hún vann til silfurverðlauna í 400 m grindahlaupi á tímanum 63,49 sek, rétt á eftir sigurvegaranum. Fjóla Signý hljóp siðan 100 m grindahlaup á tímanum 14,88 sek sem færði henni bronsverðlaun.

Hin unga og efnilega Eva María Baldursdóttir vippaði sér yfir 1,65 m í hástökkinu við mjög erfiðar aðstæður en hellirigning var á meðan hástökkið stóð yfir og dugði það til bronsverðlauna.

Að lokum var það Dagur Fannar Einarsson, efnilegur grindahlaupari, sem hljóp 400 m grindahlaupið á tímanum 58,63 sek og hlaut bronsverðlaun að launum.

Næsta verkefni frjálsíþróttafólks HSK/Selfoss er Bikarkeppni FRÍ sem fram fer i Borgarnesi 28.júlí.