Þorlákshafnar-Þórsarar eru byrjaðir að þétta raðirnar fyrir átökin í úrvalsdeild karla í körfubolta næsta vetur.
Þórsarar sömdu nýverið við þrjá leikmenn fyrir komandi tímabil. Þar skal fyrstan telja Davíð Arnar Ágústsson, Dabba kóng, sem hefur verið límið í Þórsliðinu síðastliðin ár.
Þá hafa Þórsarar fengið tvo leikmenn sem leikið hafa með Selfossi í 1. deildinni síðustu þrjú ár. Ölfusingurinn Ísak Júlíus Perdue snýr nú aftur í heimahagana eftir að hafa verið lykilmaður í Selfossliðinu og Mýrdælingurinn Skarphéðinn Árni Þorbergsson, 19 ára bakvörður, kemur einnig frá Selfossi en hann var með virkilega góðar tölur fyrir Selfoss á nýliðnu tímabili.
Einnig hafa Þórsarar gengið frá ráðningu Hjartar S. Ragnarssonar sem aðstoðarþjálfara liðsins. Hjörtur þekkir vel til liðsins en hann hefur starfað sem sjúkraþjálfari meistaraflokksliða Þórs og Hamars/Þórs og starfað við hlið Lárusar Jónssonar þjálfara.
